LAOAG CITY – Maysan a nalamiis a bangkay idi nakita ti maysa a lalaki nga agtatapaw iti karayan iti Barangay Gaang iti ili ti Currimao.
Nabigbig ti biktima a ni Aries Salaan, agtawen ti 22, awanan ti asawa, maysa a construction worker ken residente iti nadakamat a barangay.
Basar iti imbestigasyon ti Philippine National Police iti ili ti Currimao, idi mapan agsalapay iti linabaan ni Luzvimida Gonzales iti asideg ti karayan ket nakita na nga agtatapaw ti biktima agarop 10 a metro ti kaadayo na manipud iti pagtaengan da.
Dagus a naireport daytoy iti Philippine National Police ken iti panagresponde dagiti otoridad ket naduktalan a naudi a nakita ti biktima iti alas-onse iti Setyembre 16 ken nakainom daytoy ti nasanger basar met laeng ti ama daytoy.
Mapapati pay nga adda ti saan a nasayaat a panagkinnawatan ti biktima ken dagiti nagannak kenkuana ken maipagarop a ti panaginom ti nasanger ti wagas na tapno malag-anan ti rikna na.
Kabayatanna, indeklara ti Municipal Health Office iti ili ti Currimao ti biktima a pimmusay gapo iti pannakalmes na ken awan met ti nakita dagiti otoridad a foul play iti napasamak.
