LAOAG CITY – Naiget a kinondenar ni Mayor Edmar Vincent Bonoan ti napasamak a pammaltog iti Barangay 21 iti ili ti San Nicolas a nakatayan da Barangay Kagawad Joshua Madamba, agtawen ti 27 ken ti live-in partner na a ni Eloisa Jane Pagadoan Bonilla, agtawen ti 30.
Nagyaman ti mayor gapu ta naarestar a dagus ti suspek a maysa a kameng ti Philippine National Police ngem nadagsen latta ti rikna na iti napasamak iti ili da aglalo ket mismo pay nga iti uneg ti inaladan dagiti biktima ti nakapaltu-paltugan da.
Inbatad ti mayor a ti kalikagom na ket agtalinaed koma latta ti kapia iti intero nga ili ti San Nicolas.
Inrakurak ni Mayor Bonoan nga awan ti sapulen na kadagiti programa ti Philippine National Police ngem plano na ti mangestablisar ti “Bantay-Bayan” a buklen ti multi-sector wenno multi-agency a dumalan ti naan-anay a panagsanay tapno tumulong nga agbantay ken mangipatungpal kadagiti paglitegan iti nasao nga ili.
Inlawlawag ti mayor a malaksid iti panagbantay ken panangipasigurado ti linak, urnus ken talna ti “Bantay-Bayan” ket isu danto pay ti mangkita kadagiti pasdek negosyo nga awan ti permitna, dagiti pasdek nga awan ti building permit na ken mangipakat kadagiti dadduma pay a paglintegan.
Innayon na nga agala da a dagus kadagiti mayat a makipaset ti “Bantay-Bayan”, tapno matraining dagitoy ken mangiyalokar da ti pondo para iti nasao a programa.
Malaksid iti panangestablisar ti “Bantay-Bayan” ket kalikagom pay ti mayor iti ad-ado a maimontar a Closed-circuit television (CCTV) gapu ta dakkel a katulungan dagitoy tapno mamonitor dagiti mapaspasamak iti bukod da a lugar.
