LAOAG CITY – Nakababain ken tungpa iti gobierno ti kinangato ti presyo dagiti nateng iti baet a maysa nga agricultural a pagilian ti Pilipinas.
Daytoy ti inpetteng ni Miss Cathy Estavillo, sekretaryo ti Bantay Bigas.
Inpaganetget ni Estavillo a responsibilidad ti gobierno nga isu ti gumatang kadagiti produkto dagiti mannalon ken siguradwen dagiti post-harvest facilities ken no peak season ket maikabil dagitoy kadagiti cold storage.
Kuna na a no lean season ket isu metten ti pannakaiparuk-at kadagiti nasao a produkto tapno saan a maapektaran ti presyo dagiti nateng iti merkado.
Inpalgak pay ni Estavillo a ti cold storage ti basic need dagiti mannalon ngem saan a maipaay ti gobierno.
Dinakamat pay ni Estavillo dagiti sumagmamano a nateng nga arigna balitok ti presyo na kas ti kamatis, sili, sibuyas, cabbage ken dadduma pay.
Innayon na a ti maysa a rason no apay a nakangingina ti pannakailako dagiti agricultural products iti merkado ket gapu ta awan ti ipatpatungpal a price control ti gobierno ken ti nasakit a panunuten ket ti kaawan ti tulong ti gobierno kadagiti mannalon tapno masigurado a magatang iti nainkalintegan a presyo dagiti produkto da tapno saan a malugi dagiti maseknan.
Mainaig iti daytoy, inpetteng ni Estavillo a no ti ipanpanakkel ti gobierno a Kadiwa Centers ket saanna a matulungan amin dagiti mannalon gapu ta ti ad-adda a makaikabil metlaeng kadagiti produkto a mailaklako kadagitoy ket dagiti traders ken dagiti sumagmamano a mannalon nga adda ti lugan na a pagbunag kadagiti naapit da a nateng.
