LAOAG CITY – Inlawlawag ni Barangay Chairman Don Bert Agresor iti Brgy. Lipay iti ili ti Vintar ti alegasyon kontra iti agnagan ti Jerry a nagmaneho ti lugan ti barangay a maipagarup a nagpabayad nupay libre ti panaglugan dagiti residente a mapan gumatang wenno adda iti emerhensiya.
Kuna ni Agresor a barangay tanod ti nadakamat a nagan ken nagmaneho ti service vechile ti barangay.
Inbatad na a napagnunumuan da iti barangay a libre ti panaglugan ngem masapul nga adda kuma ti sukat ti krudo ken para iti maintenance ti lugan ken saan da nga agdawdawat.
Segun kenni Agresor, awan ti naibudget ti barangay para iti krudo ti service vehicle.
Mainaig iti daytoy, inlawalawag ni Agresor a nausar ti lugan a nagturong ditoy siudad ti Laoag ken minaneho ti naakusaran a barangay tanod idi daytoy a lawas.
Kuna na nga awan ti kiniddaw ti barangay tanod nga ited dagiti maseknan a nagemerhensiya kalpasan ti panagusar da ti lugan ti barangay.
Iti pannakisarita ni Agresor iti barangay tanod, kuna na a nangted ti sangaribo a pisos ti maseknan para iti krudo kalpasan a nausar ti lugan ti barangay ngem saan a maminsan nga usaren ti maseknan ti lugan nga umay ditoy siudad ti Laoag.
Inbatad ni Agresor a no sobra ti naited para iti sukat ti nausar a krudo ket mausar iti masanguanan ti supli ti kuarta a naited.
Kuna na a maigatang ti meryenda dagiti frontliners iti barangay da dagiti supli dagiti naited a kuarta para iti krudo ti lugan.
Kiniddaw ni Agresor ti panagkikinnaawatan kadagiti kabarangayan na iti baet ti epekto ti enhanced community quarantine.
