LAOAG CITY – Inlawlawag ni Barangay Chairman Melecio Piñera iti Barangay 32-B, Lapaz ditoy ciudad ti Laoag ti isyu mainaig iti panagbinnara da iti mayor ditoy ciudad.
Napasamak ti insidente kabayatan ti panagkampanya ti grupo ti local chief executive iti barangay da Piñera.
Segun ken ni Piñera, nagsurat kenkuana ti local chief executive a mapan da agkampanya iti barangay da isut gapuna a kinuyog da, ngem masdaaw gapu ta maipagarop a kwinestyunaran ti mayor no apay a kuykuyugen da ti grupo na.
Inpetteng ti kapitan nga amin a kandidato ket nawaya a mapan agkampanya iti barangay da ken no agsurat da ket kuyugen da dagitoy.
Inadmitir ti kapitan nga agibid-video iti dayta a gundaway nga isu ti kwinestyunaran pay ti mayor, ngem inlawlawag na a kanayun a kastoy ti ar-aramiden na aglalo no kadwa na ti anak na ken no rumuar para iti seguridad na.
Innayon na a kastoy ti ar-aramiden na gapu ta adda ti in-blotter na iti Philippine National Police ken adda ti pangta iti biagna iti kallabes.
Mainaig iti daytoy, inpaganetget ti kapitan nga inaramid na laeng ti trabaho na kas ama ti barangay.
