LAOAG CITY – Kinumpirmaran ni Dr. Loida Valenzuela, Provincial Vetrinarian nga addan ti lima a barangay iti ili ti Solsona ti apektado ti African Swine Fever (ASF).
Segun kenni Valenzuela, nainayun ti Barangay Juan kadagiti ummunan a naapektaran ti African Swine Fever (ASF) kas iti Lipay, Maan-anteng, Manalpac, Catangraran.
Inlawlawag na a rinugyan da metten idi rabii ti pannakaikali kadagiti baboy nga adda iti uneg ti 500 meter radius.
Inbatad na a saan da pay a nakumpirmaran no kasano a nakadanon ti ASF iti Barangay Juan ngem adda dagiti teorya da mainaig iti daytoy.
Karaman kadagiti factors nga ikonkonsiderar da iti rason ti pannakaepektar ti Barangay Juan iti ASF ket ti infected a danom, alingo, dagiti karne nga aggapo kadagiti nagsakit a taraken a naparti pakairamanan pay dagiti tattao.
Mainaig iti daytoy, binalakadan ni Valenzuela dagiti tattao a no adda ti agsaksakit a taraken ket nasken a saan a maparti.
Immapela pay ni Valenzuela kadagiti tattao iti nadakamat a lugar a makikooperar gapo ta ti ar-aramiden da ket addang a pananglapped iti posible nga ad-adda a panagwaras ti ASF.
