LAOAG CITY – Inadmitir ni Barangay kagawad Mike Juan iti Barangay 62, Navotas ditoy ciudad ti Laoag a maluksaw da gapu ta saan a dimmalan iti barangay council ti listaan dagiti nabunungan ti bagas nga aggapo iti gobierno national, Japan ken Thailand.
Inbatad na a saan a patas ti pannakaibunong dagiti donasyon a bagas iti barangay da gapu ta adda dagiti nabunungan nga adda ti mabalin na idinto nga ad-ado koma pay dagiti rebbeng na a naikkan.
Kuna ni Juan a naamoan da laeng nga adda ti bagas a maibunong kadagiti sumagmamano a kabarangayan da idi napan ti Social Welfare and Development Office (CSWD) iti barangay da.
Adda pay ti panangbabalaw na ken ni Barangay chairman Hector Cristobal gapu ta sabali pay laeng ti pinagbunag na kadagiti 70 a bags ti bagas.
Inpetteng na a dagiti tallo a nagbunag ti bagas ket naikkan da ti sagmamaysa a sako a bagas kas tanda da, ngem no isuda koma a barangay council ti nagbunag ket saanda koman a nagpatandan.
Immunan nga inlawlawag ni Barangay Chairman Cristobal a dagiti innala na a nagbunag ket dagiti adda lugan na ken inpanayun na dagitoy iti listaan tapno maikkan da ti sag-30 a kilos a bagas.
Nupay kasta, inpetteng dagiti kokonsehal iti nasao a barangay nga adda met ti luganda isut gapuna a masdaaw da no apay a saan pay laeng nga isuda ti pinagbunag ti kapitan.
