LAOAG CITY – Saan a ti pannakaipababa wenno pannakasuspenso ti fuel excise tax ti solusyo tapno maalay-ayan ti panagbiag dagiti Pilipino aglalo kadagiti gagangay nga umili iti agtultuloy a panagngato ti presyo dagiti produkto a petrolyo, nga epekto ti mapaspasamak a gubat iti Middle East.
Daytoy ti inbatad ni Father Arvin Mangrubang iti Iglesia Filipina Independiente ken mangidadaulo iti grupo a Saluadan ditoy probinsya.
Inpetteng ni Mangrubang a msapol a ti maibasura ket ti Oil deregulation law gapu ta daytoy ti ad-adda a mangparparigat kadagiti umili.
Ti oil deregulation law wenno Republic Act No. 8479 a naipasa idi 1998, ket linteg a mangikkat iti direkta a kontrol ti gobierno iti panangikeddeng ti presyo ken distribusyon ti produkto a petrolyo no sadinno a baybay-an na dagiti kompanya ti langis a mangikeddeng ti bukod da a presyo maibasar iti supply ken demand iti world market.
Inlawlawag na a no ipababa wenno masuspenso laeng ti fuel excise tax ket saan latta a malapdan ti panagngato ti presyo ti langis.
Innayon na a ti rumbeng nga aramiden ti gobierno ket ti mangipatungpal ti napaot a solusyon iti agtultuloy a panagngato ti presyo dagiti produkto a petrolyo babaen ti panangibasura ti oil deregulation law.
