LAOAG CITY – Immapela ni Navotas Representative Toby Tiangco iti Marcos administration a masapol a maresolbar ti agsasaruno a bigtime price hike kadagiti produkto ti petrolyo.
Panawagan ti nalatak nga agpanpanday linteg a panawenen a suspensoen wenno kissayan ti excise tax kadagiti produkto ti petrolyo tapno lumag-an ti epekto ti agtultuloy a panagngato ti presio ti langis.
Mainaig iti daytoy, inrekomendar ni Tiangco ti panagaramat iti turay ti gobierno iti salinong ti Republic Act No. 12316 para iti temporario a pannakasuspenso wenno ti pannakakissay ti excise tax iti petrolyo.
Segun ken ni Tiangco, saan laeng a dagiti drayber ti maapapektaran iti nangato a presio ti petrolyo gaputa mabalin pay a ngumato ti gastos iti plete, makan, delivery ken kadagiti dadduma pay a magatang iti merkado.
Inpettengna a daytoyen ti panawen nga aggaraw ti gobierno ken tulungan ti publiko iti nakaro nga epekto ti nangato a presio ti petrolyo.
Maipalagip a nagsasaruno a lawas a nangipatungpal dagiti petroleum companies ti price hike no sadinno iti uneg laeng ti tallo a lawas, umaboten iti P18.31 iti kada litro ti nagngatoan ti diesel; P15.25 iti gasolina ken P16.67 met iti kerosene.
