Natay ti maysa a nakamotorsiklo a lalaki kalpasan a nadisgrasya iti paset ti Barangay Abucay iti ili ti Piddig.

Segun ken ni Police Major Kristian Lee Badua, ti chief of police iti ili ti Piddig, ti biktima ket agtawen ti 44, awanan ti asawa ken residente metlaeng iti nadakamat a barangay.

Inbatad ni Badua a pasado alas-tres ti malem idi kalman a naawat da ti report mainaig iti napasamak a disgrasya.

Kuna na nga iti imbestigasyon da, kabayatan ti panagpapalaud ti biktima ket napukawan ti kontrol iti agkurba a paset ti kalsada a nangitunda ti panagderderetso na ken naitupar iti barikada iti igid ti kalsada.

Gapu iti napasamak ket nagsagaba ti biktima iti nakana a sugat iti nagduduma a paset ti bagina ken naideklarar daytoy a dead on the spot.