Natay ti maysa a nakamotorsiklo a lalaki kalpasan a naidungpar iti nakaparada a trailer truck iti National Highway bisinidad ti Brgy. 40, Buyon iti ili ti Bacarra.
Ti biktima ket agtawen ti 20, awanan ti asawa ken residente iti Barangay 21, Libtong iti ili ti Bacarra idinto a ti driver ti trailer truck ket agtawen ti 44 a lalaki, awanan ti asawa ken residente iti Barangay Brgy. Nararagan, Ballesteros Cagayan.
Iti imbestigasyon ti Philippine National Police iti ili ti Bacarra, agpapa-amyanan ti biktima idi nadungparna ti nakaparada a trailer truck iti igid ti kalsada ken addaan daytoy ti hazard lights.
Gapu iti daytoy, nagsagaba ti biktima kadagiti sugat kangrunaan na iti ulo na a nangitunda ti pannakatay na idinto a saan a nadangran ti driver ti trailer truck.
Saan pay a masinunuo ti PNP iti ili ti Bacarra no nakainom ti arak ti biktima idi napasamak ti insidente, ngem daytoy ket nakasuot ti helmet, reflectorized vest ken addaan ti driver’s license.
