LAOAG CITY – Kondinaren ti Saluadan Group, maysa a grupo dagiti environmental advocates iti pannakaipatakder ti Offshore windmill project iti ili ti Burgos.

Inbatad ni Father Arvin Magrubang a nupay agbalin a renewable energy capital ditoy probinsia, kunana a marikna da nga awan ti maipaayna a pagimbagan dagiti ilokano.

Segun kenkuana, mabenepisiaran laeng dagiti pribado a kompania a mangipasdek ti nasao a windmill.

Inpettengna a dagiti taxes manipod kadagiti nasao nga renewable energy infrastructure ket maipan kadagiti simple nga Ilocano babaen iti Ilocos Norte Electric Cooperative wenno INEC.

Innayon ni Fr. Mangrubang a dagiti naipatakder nga imprastraktura ket saan a makatulong kadagiti simple laeng nga Ilocano ken awan ti maipaayna a pagimbagan.

Immunan a nagbalin a nabara nga isyu ti pannakaipatakder ti windmills iti kabaybayan ti ili ti Burgos no sadinno nga adon dagiti immuna a nangkondenar iti daytoy.