LAOAG CITY – Nasdaaw ni Barangay Kagawad Florante Alejo iti Bgry. 6 iti ili ti San Nicolas kalpasan ti pannakatiliw ti kabarangayanna a suspek iti naisayangkat nga Anti-Illegal Drug Buy-Bust operation iti nasao a lugar.
Segun kenkuana, saanda nga ekspektaren nga adda pakanaigan ti suspek iti illegal a droga gapu ta mairekreklamo laeng iti maipagarop panagtakaw iti kalding.
Nabigbig ti suspek a ni Kirby Crisostomo, agtawen ti 44, awanan asawa ken residente iti Brgy. 6 iti ili ti San Nicolas.
Iti biang ni Kirby, maipagarop nga adda kellaat a simrek iti kuartona no sadinno maipagarop a binekkel ken tinutokan ti paltog ti maysa polus ken binagaan daytoy a patayenna no agtagari ken maipagarop a napabulsaan ti maatap a shabu.
Innayonna a saan daytoy nga aglaklako ti illegal a droga ken no maipanggep ti maipagarop a panagtakawna ti kalding ket awan kinapaysuananna daytoy gapu ta maipagarop a naipalako laeng kenkuana.
Segun ken ni PMaj. Reginaldo Dalipias, Chief of police iti Philippine National Police iti ili ti San Nicolas nabayagen nga i-monmonitorda daytoy suspek.
Mainaig iti daytoy, kinunana nga adda ti pakanaigan ti suskpek kadagiti immunan a naarestar nga Anti-Illegal Drug Buy-Bust Operation iti nasao nga ili.
Maipalagip a natiliw ti suspek babaen iti naisayangakt nga Anti-Illegal Drug Buy-bust Operation iti Brgy. 6 iti ili ti San Nicolas.
Nakumpiskar manipod iti suspek ti lima a plastic sachet a naglaon ti maatap a shabu ken lima a ribu a pisos a nausar kas buy-bust money.
Naammoan a ti nasao a suspek ket datin a naibalud iti Bilibid Prison idi tawen 2008 ngem nakaruar iti pagbaludan idi 2018 gapu met laeng iti panaglabsingna iti Republic Act No. 9165 wenno ti Comprehensive Dangerous Drugs Act of 2002.
