LAOAG CITY – Nabagkong ti maysa a barangay kagawad babaen iti pada na met laeng a kagawad iti Barangay Abucay iti ili ti Piddig.
Segun kenni Police Major Kristian Lee Badua, ti chief of police ti Philippine National Police iti nasao nga ili, ti biktima ket ni Kagawad Baptista idinto a ti suspek ket ni Kagawad Nicolas.
Inlawlawag na a basar iti inisyal nga imbestigasyon da, kabayatan ti panag-practice dagiti ubbing para iti piyesta ti ili da ket maipagarop a sinerraan ti suspek ti pagparkingan rason a dinillaw ti biktima ti inaramid na.
Gapo iti daytoy, nagsinnungbat dagiti dua agingga a nagawid ti suspek ken idi nagsubli ket addan ti iggem na a kutsilyo ken naggabbo dagitoy a nangitunda iti pannakabagkong ti biktima.
Kuna ni Badua a malaksid iti daytoy ket adda pay ti sabali a kitkitaen da nga anggulo ken kumpirmaran da dagiti makalkalap da nga impormasyon a maipagarop nga addan ti dati a saan a panagkinnaawatan dagiti dua iti saan pay a masinunuo a rason.
Naamoan a ti biktima ken suspek ket agpada nga adda iti impluwensya ti nasanger idi napasamak ti insidente.
Mainaig iti daytoy, kuna ni Badua nga adda ti panagbabawi ti suspek ngem saan na nga inbuksilan no adda pay ti naun-uneg a rason ti panangbagkong na iti biktima.
Iti agdama, ti suspek ket nagtalinaed iti kustudiyar ti Philippine National Police idinto a ti biktima ket adda iti stable a kondisyon ken agpapaimbag iti Mariano Marcos Memorial Hospital and Medical Center iti ciudad ti Batac
Kabayatann, desidido met ti biktima nga agpila ti reklamo kontra iti suspek, ken ti aramiden ti pulisya ket ti pannakisarita da iti Department of the Interior and Local Government ken inrefer da daytoy iti Liga ng mga Barangay.
