LAOAG CITY – Pinaikkat a mismo ni Barangay Kagawad Edmar Salvatiera iti Barangay 47, Bengcag ditoy ciudad ti Laoag ti nagan ti ama na iti listaan dagiti naala a benepisyaryo ti Social Amelioration Program (SAP) iti nasao a barangay.
Inaramid daytoy ti kagawad kabayatan ti pannakaibunong ti SAP iti barangay da itay bigat.
Immunan nga adda dagiti nagreklamo gapu iti pannakairaman ti nagan ti ama na iti SAP idinto nga adda dagiti annak na iti abroad.
Inbatad na a basar iti palawag dagiti nagvalidate a kameng ti DSWD ket kwalipikado ti ama na nga umawat ti SAP gapu ta addan ti sabali a pamilya na ken babassit pay dagiti annak na.
Malaksid iti daytoy, dagiti kakabsat na nga adda idiay abroad ket adda metten ti bukod da a pamilya ken apektado da met ti covid-19 crisis.
Nupay kasta, tapno saanen nga umatiddog ken agsardengen ti isyu ket nagdesisyon ti kagawad nga ikkaten na lattan ti nagan ti ama na iti listaan dagiti benepisyaryo ti SAP.
