LAOAG CITY – Balligi a naarestar ti maysa a barangay kagawad a maibilang kas High Value Individual iti naisayangkat nga anti-illegal drug buy-bust operation iti Barangay Ugis iti ili ti Nueva Era.
Segun ken ni Police Capt.William Sotelo, ti chief of police iti ili ti Nueva Era, ti subject ti operasyon ket maysa a Barangay Kagawad, agtawen ti 35, residente iti Barangay Parangopong iti nasao nga ili.
Inbatad ni Sotelo nga iti naisayangkat nga operasyon ket nakumpiskar manipod iti suspek ti 13 a pedaso ti maipagarop a shabu nga agbalor ti 20 ribo a pisos ken 8 a bala ti cal. 22 a paltog.
Inpakaammo ni Sotelo a nabayag a minonitor da ti suspek ken naduktalan a daytoy ti napigsa nga agsupsuplay ti maipagarop nga illegal a droga iti kaadoan a barangay iti ili ti Nueva Era.
Kinumpirmaran pay ti hepe ti pulisya a ti suspek ket adda ti grupo na nga agiwarwaras ti maipagarop nga illegal a droga iti ili ti Nueva Era ken isuna ti intudo dagiti immunan a natiltiliw da nga isuna ti lider da .
Innayon na a ti pagal-alaan ti barangay kagawad kadagiti iwarwaras na a maipagarop nga illegal a droga ket iti ili ti Badoc, ngem saanen a nangipaay ti dadduma a detalye para iti seguridad na.
Kabayatanna, inrakurak ni Sotelo nga adda dagiti immunan a report ken nangkumpirmar a ti nasao a suspek ket adda ti ik-ikotan na a paltog, ngem iti panagisayangkat da nga operasyon ket saanna a bitbit daytoy.
Saan met a masinunuo ti opisyal no nangikabilan ti barangay kagawad ti paltogna.
Iti agdama, nagtalinaed ti suspek iti Philippine National Police iti ili ti Nueva Era ken napilaan metten ti kaso a panaglabsing iti Republic Act 9165 wenno Comprehensive Dangerous Drugs Act of 2002 ken ti Republic Act 10591 wenno Comprehensive Firearms and Ammunition Regulation Act.
