LAOAG CITY – Inpetteng ti aktres a ni Barbie Forteza a saanna a rumbeng nga ikkan ti maikadwa a gundaway ti nakarelasyon na a nanggulib wenno nangluko kenkuana.
Inlawlawag na a pinadakkel dagiti nagannak na a rumbeng nga ipategna ti bukodna a bagi nga isu met ti ar-aramiden na.
Inbatad na a napateg unay kenkuana ti bukodna a bagi isut gapuna a saanna pulos a maawat no lukwen laeng ti karelasyon na.
Inpaganetget ni Barbie a napateg ti oras ken atensyon na isut gapuna a no adda man ti mapili na a lalaki nga ipateg ket saanna a rumbeng a guliban wenno lukwen, gapu ta saanna pulosen nga ikkan ti maikadwa a gundaway.
Maipalagip a nagbalin a kontrobersyal ti rakurak ni Barbie iti kallabes a kaykayatna ti mapan agkasar idiay Las Vegas, Nevada, USA gapu ta adda ti diborsyo.
Nupay kasta, inbabawi met laeng ni Barbie ti rakurak na kalpasan a nailawlawag kenkuana babaen kadagiti sumagmamano nga abogado a rekognisaren laeng ti sabali a pagilian ti diborsyo no gangannaet ti maasawa, ngem ditoy Pilipinas ket saanna a bigbigen ti diborsyo.
