LAOAG CITY – Naarestar ti maysa a barista kalpasan ti inyuswat nga anti-illegal drug buy bust operation dagiti kameng ti Philippine Drug Enforcement Agency (PDEA) ken National Bureau of Investigation (NBI) iti Brgy. 1 iti ili ti San Nicolas.
Nabigbig ti suspek a ni Ron Allen dela Cruz, residente iti Brgy. Sta Maria ditoy siudad ti Laoag.
Iti innuman ti Bombo Radyo kenni Atty. Diosdado Araos, mangidadaulo ti NBI, kuna na a nangrugi a namonitor ni dela Cruz idi Setyembre kalpasan a naimaldit kas Number 5 Drugs Watchlist iti NBI.
Inbatad na a daytoy ti namunganayan ti operasyon kenni dela Cruz ken rason metten ti pannakakumiskar da iti maysa a sachet ti marijuana a nabungon ti papel ken ti 1,000 a pisos a buy buy bust money.
Mainaig iti daytoy, kuna ni Araos a sakop ti suspek nga ik-ikkan ti suplay ti marijuana dagiti establisyimento nga adda iti lawlaw ti pagpapaayan na.
Innayun na a posible nga aggapo iti siudad ti Baguio ti suplay iti nasao a suspek.
Kabayatanna, naamoan a nagus-usar ni dela Cruz ti marijuana ngem naisardeng na idi Disyembre itay napan a tawen.
Iti agdama ket agtutuloy ti imbestigasyon dagiti oridad ken beripakasyon nu adda ti pananakainaig ni dela Cruz iti immunan a naarestar a maysa a call center agent itay kallabes.
