LAOAG CITY – Kinumpirmaran ti Philippine Coastguard (PCG) a naka-base iti ili ti Currimao nga adda ti maysa a barko a simmanglad iti pantalan ti Omnico iti nasao nga ili, addan makalawas ti napalabas.
Daytoy ti kinumpirmaran ni Commander Lauren Paul Mariano Jr. iti PCG-Currimao.
Segun kenni Mariano, ti barko ket nagkarga kadagiti semento nga umabot ti 11 a tonelada ken aggapo daytoy idiay Taiwan.
Inbatad na a saan da pay a masigurado no mano amin ti crew ti barko gapu ta iti agdama ket masapol nga ag-quarantine dagiti maseknan iti uneg ti 14 nga aldaw.
Iti agdama, kuna ni Mariano a naiget ti panangbanbantay da ti barko tapno masigurado a saan a basta makaruwar dagiti nakalugan a crew.
