LAOAG CITY – Nagdinnungpar ti maysa a barko ti China Coast Guard (CCG) ken maysa a barko ti Philippine Coast Guard (PCG) iti asideg ti Escoda Shoal iti West Philippine Sea (WPS).
Segun iti China Coast Guard spokesperson a ni Gan Yu, illegal a simrek dagiti barko ti Philippine Coast Guard a BRP Bagacay ken BRP Cape Engaño iti lugar nga awan ti pammalubos manipud China.
Inakusaran pay ti Chinese official ti BRP Bagacay a ingagara da ti panangdungpar iti China Coast Guard vessel.
Kinuna ni Gan nga inaramid met ti China Coast Guard ti “control measures” kontra kadagiti barko ti Pilipinas, no sadinno nga inpetteng da a ti Pilipinas ti akin-aramid iti insidente.
Malaksid iti daytoy ket pinangtaan pay ni Gan ti Pilipinas nga isardengda a dagus ti panaglabsing ken panagprobokar, kagiddan panangipetteng na iti kinasoberanya ti Beijing iti Escoda Shoal.
Mainaig iti daytoy, awan met pay ti statement ti Philippine Coast Guard seknan iti daytoy, ngem immunan a pinasingkedan ti dati nga opisyal ti United States Air Force ken dati a defense attaché a ni Ray Powell, nga agus-usar ti China Coast Guard iti water cannons kas control measures.
Innayonna nga iti monitoring da ket masansan nga agresibo dagiti aktibidad ti China Coast Guard iti Escoda Shoal iti paset nga pangisaysayangkatan tu BRP Teresa Magbanua iti resupply mission.
Kabayatanna, ti Escoda Shoal ket masarakan 75 nautical miles wenno agarup 140 kilometro manipud Palawan ken adda iti uneg ti 200-nautical-mile exclusive economic zone (EEZ) ti Pilipinas.
