LAOAG CITY – Manamnama a mairuar ti baro a mapa ti Pilipinas no sadinno a nakaikabil ditoyen ti Exclusive Economic Zone (EEZ) ken dagiti archipelagic waters ti pagilian pakairamanan ti West Philippine Sea (WPS).
Daytoy ket kabayatan a maiyur-uray pay laeng ti Implementing Rules and Regulations (IRR) ti baro a linteg a Philippine Maritime Zones Act a pinirmaan ni Presidente Ferdinand Marcos Jr. idi kalman.
Inbatad ni National Mapping and Resource Information Authority (NAMRIA) Undersecretary Peter Tiangco nga isagsaganadan ti mapa ken manamnama a mai-update daytoy kadagiti baro a pagannurotan.
Inlawlawag ni Tiangco a dakkel ti nagdumaan ti baro a mapa maidasig iti inaramid ti China gapu ta addaan daytoy ti legal a panangibasaran ken suportado ti maipatpatungpal a linteg.
Inpasingkedna a ti maaramid a mapa ket saan nga agsalungasing iti linteg.
Naammoan nga apaman a mairuar ti Implementing Rules and Regulations ket mangipaay daytoy ti go signal iti National Mapping and Resource Information Authority tapno iruaren ti baro a mapa nga arig kas dash line ti China ngem daytoy ket legal.
Kuna ni Tiangco a ti National Mapping and Resource Information Authority ket iti teknikal ken taga- drawing laeng no ania ti napagnunumoan dagiti nagduduma a grupo no ayannoda a karaman.
Nadakamat a 2012 pay laeng ket napagsaritaanen nga agsukat ti mapa isu a nagbalin a naannadda iti panangaramid no sadinno a naaddaan nga umuna ti panangtingiting manipud kadagiti nagduduma nga ahensia ti gobierno.
