LAOAG CITY – Inpeksa ni Atty. Juanito Antonio ti karirikna ken kapanpanunutan na mainaig iti baro a protocols nga inyetnag ti gobierno probinsyal partikular iti panagbyahe a rumwar ken sumrek ditoy Ilocos Norte.
Segun kenni Antonio, ti nasao a baro a protocol ket arig na panangparigat kadagiti rumwar ken sumrek ditoy probinsya iti laksid nga adda ti inkeddeng ti National IATF nga “uniform travel protocol”.
Ummuna iti daytoy, adda ti inyetnag ti IATF a resolusyon seknan iti panagpapada ti protocol dagiti probinsya ngem ti laeng desisyonan ti kada LGU ket no i-require da a dumalan dagitoy iti testing.
Inpetteng na a ti baro a protocol ti gobierno probinsyal ket saanen a maibilang a “motorist friendly” gapo ta arig na napagbalin pay a padagsen.
Para kenni Atty. Antonio, arig na awan met laeng ti serbi ti Resolution No. 101-2021 gapo ta naikkan met laeng ti kada lokal a gobierno a mangiyetnag ti bukod a pagannurutan.
Inlawlawag na a no saan laketdi a makompromiso ti salun-at ti tattao ket masapol a naluklukay kuma ti protocols kas iti saan a panag-quarantine kas nailanad iti resolusyon ti National IATF.
Mainaig iti daytoy, kunana nga arig na mairanranta a saan a manayunan dagiti aginspeksyon wenno mangamiris kadagiti dokumento dagiti sumrek ditoy probinsya tapno saan unay nga atiddog ti pila iti border ken saan a mautuyan dagiti motorista.
