LAOAG CITY – Inrakurak ti maysa a grupo kaduana ni Rep. Leila de Lima a ti baro a reklamo kontra ken ni Vice President Sara Duterte ken 15 a dadduma pay iti Ombudsman ket mabalin nga agbalin a pangibasaran ti baro nga impeachment complaint inton Pebrero 2026.
Ti reklamo ket adda ti pakainaiganna iti maipagarup a saan nga husto a panagusar ti P612.5 milyon a confidential funds, pakairamanan dagiti sumagmamano nga opisial kas kada Office of the Vice President chief-of-staff Zuleika Lopez ken dati a Department of Education undersecretary Michael Poa.
Inbatad ni Matthew Silverio ti Student Council Alliance of the Philippines, posible daytoy nga agtennag iti kaso iti Sandiganbayan wenno impeachment.
Inlawlawagna a napigsa ti ebidensia nga inpakitada iti Ombudsman.
Mainaig iti daytoy, kuna ni De Lima nga ad-adda a nalawlawag dagiti ebidensia itatta a mabalin a pangibasaran iti impeachment.
Kabayatanna, inawagan ni Duterte ti reklamo kas “fishing expedition,” ngem naiget daytoy a naglikudan ni De Lima gapu iti kinaadu dagiti ebidensia.
