LAOAG CITY – Temporario nga inikkat ti Estados Unidos ti sumagmamano a sanctions daytoy para iti produkto a petrolyo ti Iran tapno makatulong iti suplay ti energy markets iti baet ti kumarkaro a rinnupak idiay Middle East.
Segun ken ni United States Treasury Secretary Scott Bessent, pinalubosan ti limitado a panaglako ti langis ti Iran nga agdama a nakakarga kadagiti barko daytoy iti rehion.
Ti nasao a pammalubos ket temporario laeng ken agpaut agingga inton Abril 19.
Gagem daytoy a manayonan ti suplay ti langis iti lubong no sadinno a mapatta-patta nga umabot iti 140 a milyon a bariles ti mabalin a mailako.
Iti agdama, nangato ti presio ti langis no sadinno a ti Brent crude ket umaboten iti sumurok-kumuranag $112 iti kada bariles.
Nupay kasta, adda dagiti eksperto a nangibaga a mabalin a limitado laeng ti epekto daytoy iti panagbaba ti presio.
Adda ti panagamak a ti mapastrek manipud iti panaglako ti langis ket maikabil iti gobierno ti Iran ken maipagarup a mausar laeng iti operasionda para iti gubat.
Naammoan a ti kangrunaan a gumatgatang ti nalaka a langis manipud idiay Iran ket ti China ngem namnamaen ti Estados Unidos nga iti baro a pagannurotan ket maikabil ti suplay kadagiti dadduma pay a pagilian kas iti India, Japan ken Malaysia.
Iti baet daytoy a desision ti Amerika, agtultuloy latta a maap-apektaran ti sangalubongan iti suplay ti langis gapu iti riribok iti Strait of Hormuz, maysa a napateg a ruta no sadinno a dumaldalyasat iti dakkel a paset ti oil supply iti lubong.
