LAOAG CITY – Manamnama nga agoperaren ti baro a tangke ti San Nicolas Water District nga adda iti Brgy. 22 iti ili ti San Nicolas.
Segun ken ni Ms. Marlyn Bonilla, Manager ti San Nicolas Water District, babaen iti daytoy ket masuplayan dagiti sumagmamano a barangay iti sentro kas ti Brgy. 9 agingga iti Brgy. 14.
Inpasingkedna a saanto nga agpukaw ti serbisio iti suplay ti danom iti baet nga adda dagiti gundaway nga aggegeddan dagitoy nga agusar ti danom.
Kunana nga iti agdama ket adda ti walo a bubon ti San Nicolas Water District.
Maipalagip nga adda dagiti sumagmamano a residente a makapaspasar ti panagawan wenno panagkapsot iti suplay ti danom nangruna iti bigat.
