LAOAG CITY – Natay ti maysa a baro kalpasan a nadesgrasia iti national highway ti Ilocos Norte – Abra Road a paset iti Brgy. Lorenzo iti ili ti Banna.
Segun ken ni Police Major Chris Anthony Sorsano, ti Hepe iti Philippine National Police iti nasao nga ili, nabigbig ti biktima nga agtawen ti 19, awanan asawa ken residente ti Brgy. Valenciano iti nasao met laeng nga ili.
Inlawlawagna a basar iti insayangkatda nga imbestigasion, apaman a nakadanon ti biktima a nangiturong ti motorsiklo a Yamaha Mio nga agmaris ti nangisit iti kurbaan a paset ti kalsada ket kellaat a napukawan ti kontrol ti manibela.
Gapu iti daytoy, inpalgakna a naidungpar ti biktima iti concrete bridge a nangitunda ti panagsagabana ti nakana a sugat nangruna iti ulona.
Kunana a maipagarup a nabartek ti biktima idi mapasamak ti desgrasia.
Kabayatanna, agtultuloy pay laeng ti imbestigasion dagiti otoridad maipapan iti nasao a desgrasia.
