LAOAG CITY – Inbatad ni Sanggunian Panlalawigan Member Domingo Ambrocio Jr. nga aramiden amin nga addang ti gobierno probinsyal tapno matulungan dagiti mannalon ditoy probinsya.
Daytoy ket iti baet ti arungaing dagiti mannalon a nababa ti presyo ti irik nu pay ado ti maapit.
Segun ken ni Ambrocio, ikarigatan da a mangbukel ti scheme wenno alternatibo nu sadino nga agderetso ti kita kadagiti mannalon ken saan a kadagiti traders.
Mainaig iti daytoy, kuna na nga itay napan a tawen ket adda ti 35 a milyon a pisos a naiyalokar para iti paggatang ti irik ken nanayunan ti 10 a milyon a pisos iti katenggaan ti 2019.
Kuna na a daytoy ket babaen pay laeng ti implementasyon ti buyback operation nga inrugi ni Senador Imee Marcos idi isuna pay laeng ti gobernador ditoy probinsya nu sadino a kabinnulig na ti National Food Authority (NFA) a gumatang iti irik.
Nu pay kasta, inbatad na a saan a magwantaan ti NFA ken gobierno probinsyal ti gumatang ti irik iti agdama isut gapu na a narigat ti sitwasyon nangruna ita a panawen a naiggidan ti mapaspasaran a pandemiya.
Inlawlawag na a ti dua a pisos manipod iti 19 a pisos a presyo ti maysa a kilo nga irik ket bingay ti gobierno probinsyal.
Kabayatanna, inpagunam gunam na iti publiko a saan nga agkedked nga iyuman kadadagiti opisyal dagiti isyu wenno ammo nga addang para iti pagsayaatan ti amin tapno daytoy ti maipangpangruna a maikkan ti atensyon.
