LAOAG CITY – Naitantan ti basketball competition a nagbaetan ti National Capital Region ken ti Northern Mindanao gapu iti panagpukaw ti serbisio ti kuriente ditoy siudad ti Laoag.
Nagawan ti serbisio ti kuriente gapu iti manarimaan a maisaysayangkat a line patrol ti Ilocos Norte Electric Cooperative wenno INEC.
Naammoan a dagiti naapektaran a barangay ket ti sumagmamano a paset ti Barangay 1 agingga iti Barangay 16 ditoy siudad ti Laoag.
Gapu iti daytoy, kiniddaw ti Ilocos Norte Electric Cooperative ti naan-anay a pannakaawat dagiti member-consumer owners.
Mainaig iti daytoy, inpakaammo ni Mr. Leo Pujante, Coach ti National Capital Region ti Basketball Secondary a nagbalin a naiget ti panagsaganada para iti Palarong Pambansa 2025 nangruna ket isuda ti Defending Champion iti napalabas a tawen.
Kabayatanna, kuna ni Mr. Timothy Matias, Most Valuable Player iti Palarong Pambansa 2024 nga inpaayda ti amin a kabaelanda iti panagsanay isu a mangnamnamada a magun-od ti panagballigi.
