LAOAG CITY – Inbatad ni Brgy. Chairman Ruben Ancheta iti Brgy. Barit ditoy ciudad ti Laoag nga aggapo iti surong wenno sabali a lugar dagiti basura iti irigasyon a sakupen ti barangay da.
Kunana a malaksid kadagiti basura, adda pay dagiti natay a dingwen a maiyan-anod iti nasao nga irigasyon nga isu ti pakaluksawan dagiti maapekaran.
Segun kenni Ancheta, agpatingga iti lugar da dagiti maiyanod a basura manipud iti Surong ken saan a makalusot dagtoy nangruna ket adda ti steel plate a malukatan no kasapulan ti danom dagiti pagturungan na a barangay.
Inlawlawag na a sumagmamanon a tawen a problema da daytoy no sadinno ket nagduduma nga asosasyon dagiti mannalon dagiti barangay a maseknan ti mapmapan agdaldalos.
Mainaig iti daytoy, kunana nga iti kallabes ket adda ti panagtataripnong dagiti kapitan, presidente ti sanghera iti kada barangay ken iti NIA no sadinno ket adda ti naplano a tunggal boundary iti barangay ket adda ti maipan a serra tapno makita no sadinno ti paggapoan ti basura ngem saan agpapan ita ket saan pay a naipatungpal gapo ta dakkel ti pondo a mausar.
Kabayatanna, plano da ken dagti sanghera ti agkamang iti konseho ditoy ciudad ti Laoag ken iti opisina ti Mayor tapno agkiddaw ti tulong ken masolbar ti problema da seknan iti basura iti irigasyon.
