LAOAG CITY – Naituding ti panagkallaysa ti aktres a ni Bea Alonzo ken ti bilyonaryo a negosyante a ni Vincent Co iti mabiit.
Nakumpirmaran daytoy kalpasan a naiparuk-at iti online Mass tig St. Peter the Apostle Parish Church idiay Paco, Manila, ti marriage banns, no sadinno a nadakamat ti nagan da Bea ken Vincent.
Ti marriage banns ket ti opisyal a panangiwaragawag ti simbaan Katolika maipanggep iti plano a panagkasar ti dua nga indibidual.
Gagem daytoy nga ipakaammo iti komunidad ti umadanin panagkasar ti dua nga indibidual tapno maamoan no adda ti possible a manglapped iti daytoy.
Saan pay a nangiparuk-at ti reaksyon ti kampo da Bea ken Vincent mainaig iti daytoy a banag, ngem rumrumuar a ti pagkasaran dagiti dua ket iti vineyard a kukua ti pamilya Co idiay Spain iti sumaruno a bolan.
