LAOAG CITY – Naawaten dagiti benepisyaryo ti kaunaan a Review and Examination Assistance Program wenno REAP nga inpaay ti Provincial Government of Ilocos Norte kadagiti nagaplikar iti licensure examination.
Segun ken ni Mr. Willie Jake Sib-at, Officer In-charge ti Provincial Education Office adda ti pakabuklan a 197 dagiti benepisyaryo nga immawat iti 4,000 ti tunggal maysa.
Immununan nga inpakaamo ni Sib-at, a ti kangrunaan a nagibasaranda iti panagpili kadagiti kualipikado ket ti mapaspastrek ti pamilia dagiti aplikante.
Inlawlawagna a kaaddoan kadagiti kualipikado iti nasao a programa ti probinsia ket dagiti dati nga iskolar ti probinsia nangruna dagiti nagturpos iti teacher education.
Inrakurakna nga iti babaen daytoy a programa ket matulogan dagiti umili a maksayan dagiti kasapulanda a bayadan iti panagsaganada sakbay iti panag-exam da.
Malaksid iti daytoy ket naawat metten dagiti iskolar ti Agriculture ken Fisheries ti Provincial Government of Ilocos Norte (PGIN) ti thesis subsidy da iti babaen ti panagidaulo ni Gov. Matthew Marcos Manotoc.
Nakaawat dagiti 3rd year student ti tig-sangapulo na ribu a pisos idinto a tig-15 a ribu a pisos dagiti 4th year students.
