LAOAG CITY – Maysa a benepisyaryo ti Tulong Panghanapbuhay sa Ating Disadvantaged/Displaced Workers (TUPAD) ti nangipeksa ti sakit ti nakem na kalpasan a saan a naipaayan ti sweldo para iti 15 nga aldaw a panagtrabaho na.
Segun ken ni Mrs. Remelyn Ramos iti Brgy. 29 ditoy siudad ti Laoag ken benepisyaryo iti nasao a programa, adda ti napirmaan na a kontrata iti Department of Labor and Employment para iti panagtrabaho na iti Tulong Panghanapbuhay sa Ating Disadvantaged/Displaced Workers.
Inbatad na nga apaman a nangrugi ti panagdaldalus da iti barangay ket adda pay ti sabali a dokumento nga inpapirma ni Kapitan Franklin dela Cruz rason nga inpagarop na nga awan ti agbalin a problema iti panagbalin na a benepisyaryo.
Nu pay kasta, kuna na nga apaman a nadanon ti aldaw ti payout ket awan ti nagan na iti listaan ken saan a nakaawat ti sweldo.
Inpakaammo na a basar iti palawag ti Department of Labor and Employment ket nagdoble a benepisyaryo rason a naikkat ti nagan na.
Mainaig iti daytoy, inpetteng ni Ramos a masdaaw iti saan a pannakaikkat dagiti dadduma a kakadua na gapu ta agpapada da met a nagdoble iti nasao a programa ken addan innem a bulan ti napalabas sipud iti immuna a panagbalin na a benepisyaryo.
Kabayatanna, inbatad na nga apaman nga indanon na iti kapitan ti napasamak ket naibalakad a mapaggugudwaan ti innem a ribo a pisos koma a sweldo na nu sadino a 130 a pisos ti kontribusyon ti tunggal maysa manipod iti 43 a kadagupan dagiti benepisyaryo.
