LAOAG CITY – Inbatad ni Fire Officer 3 Ramon Pascua Jr. iti Bureau of Fire Protection iti ili ti Pagudpud nga agtultuloy paylaeng ti imbestigasyon da iti pannakauram ti dua a balay iti Barangay Balaoi iti nasao nga ili.
Inrakurak na nga addan ti kitkitaen da a posibilidad iti nangrugyan ti uram ngem saan da paylaeng a mabalin nga ipublikar gapu ta masapol a kumpirmaren da paylaeng nga umuna daytoy.
Maipalagip a ti maysa a balay ket naminpinsan a dimmapo idinto a ti maysa ket adda laeng ti sumagmamano a pasetna a nauram.
Kuna ni Pascua nga umabot iti 45 a ribo a pisos ti balor dagiti laeng balay a nauram, saan pay a karaman ditoy dagiti linaon na a kagamitan.
Inpakaammo na nga alisto a nagramram ti apoy gapu ta malaksid a napigsa ti angin ket naaramid pay ti light materials dagiti nasao a balay.
Innayon na a nagpaot ti 25 a minutos sakbay a naan-anay a nasaebseban ti apoy.
Mainaig iti daytoy, nadakamat pay ni Pascua a nangipaay met a dagus ti tulong ti lokal a gobierno iti ili ti Pagudpud kadagiti naapektaran ti uram aglalo ket awan pulos ti nasalbar a gamit ti pamilya a napukawan ti pagtaengan.
