LAOAG CITY – Naka-heightened alert ti Bureau of Fire Protection nangrugi idi Oktubre 28 agingga intono bigat, Oktubre 30 kas paset ti panagsagsagana para iti Undas wenno Oplan Kaluluwa ditoy probinsya.
Daytoy ti inbatad ni Fire Supt. Roxanne Parado, ti firemarshall ditoy Ilocos Norte.
Inlawlawag na a dagiti kameng ti Bureau of Fire Protection ket naiwaras kadagiti kalsada tapno asistiran da dagiti motorista.
Kuna na a mangrugi met intono Oktubre 31 agingga iti Nobyembre 2 ket naka-red alert da no sadinno nga amin a personnel da ket nakaduty ken maiwaras dagitoy kadagiti kamposanto iti intero a probinsya.
Inpakaammo na a malaksid kadagiti maiwaras kadagiti kamposanto a personnel da ket adda pay dagiti maikabil nga agbantay kadagiti kabaybayan gapu ta isu ti maysa a pagturungan dagiti tattao ita nga Undas.
Innayon ni Parado a saanda a kayat nga adda dagiti saan a nasayaat a mapasamak mainaig iti daytoy a bakasyon.
