LAOAG CITY – Naiget ti panangtungpal ti Bureau of Fire Protection ditoy ciudad ti Laoag iti mandato ti Department of the Interior and Local Government kas iti saan a panangiyendorsar iti aniaman a brand ti fire extinguisher.
Daytoy ti inpasigurado ni Fire Senior Inspector Edison Reyes, ti city firemarshall iti Bureau of Fire Protection ditoy ciudad ti Laoag.
Kuna na a no adda dagiti pasdek negosyo a mapan mangala ti permitna iti Bureau of Fire Protection ket saan da a mabalin ti agiyendorsar iti aniaman a trade name wenno kompanya ti fire extinguisher.
Nagballaag ni Reyes a no adda dagiti kameng ti Bureau of Fire Protection a manglabsing iti daytoy ket mabalin a sumango ti kaso administratibo.
Innayon na a sipud nagtugaw kas mangidaulo iti ahensya ket kanayun na a palagipan dagiti adda ti babaen na a sumurot iti mandato ti Department of the Interior and Local Government tapno awan ti pakabasulan da.
