LAOAG CITY – Nangisayangkat ti inspeksion ti Bureau of Fire Protection iti ili ti San Nicolas kadagiti paglakoan ti paputok iti asideg iti maysa a dakkel a mall iti nasao nga ili.
Indauloan mismo ni Fire Senior Inspector Edison Reyes, Municipal Fire Marshal ti Bureau of Fire Protection iti ili ti San Nicolas ti pannakaiwayat ti inspeksion.
Segun kenkuana, maymaysa pay laeng ti nakapuesto nga aglako kadagiti paputok a manamnama a manayonan pay dagitoy inton bigat.
Inlawlawagna kas maiyataday iti pagannurotan ket masapol nga adda ti naka-standby a fire extinguisher iti mismo puestoda.
Malaksid iti daytoy, kunana a rumbeng nga adda pay ti drum nga adda ti kargana a danom iti asideg iti paglakoanda ti paputok no bilang adda ti mapasamak nga uram.
