LAOAG CITY – Nabagkong ti buksit ti agnagan iti Jeric Mark Vergara, agtawen iti 29, awanan ti asawa ken Bgy. Tanod iti Bgy. 17 Sta. Asuncion iti ili ti San Nicolas.
Nabigbig met ti suspek a maipagarup a nangbagkong kenkuana a ni John Jovy Abuluyan, agtawen iti 23 ken residente met la iti nasao a lugar.
Basar iti pakpakauna nga imbestigasyon ti PNP- San Nicolas, napan nakiminatay ti biktima ken ti suspek ket bayat nga agga-ayam da iti baraha, rimsua ti saan da a panagkikinnaawatan ngem naanawa da.
Ngem idi agawiden ti biktima, maipagarup a sinada ti grupo ti supek ket dita a napasamak ti nabara manen a diskursiyon inggana a maipagarup a bingakong ti suspek ti biktima.
Naitaray nga insigida ti biktima iti Laoag City General Hospital ngem naiyakar iti Mariano Marcos Memorial Hospital and Medical Center iti ciudad ti Batac para iti naan-anay a panakaagas na.
Nagtartaray met dagiti suspek ken dagiti kakaduana ngem iti “follow-up operation” ket natiliw da.
Agtultuloy pay laeng ti naun-uneg nga imbestigasyon seknan iti nasao a pasamak.
