LAOAG CITY – Inadmitir ti aktres a ni Bianca Umali a saan a maliklikan ti panagimon iti relasyon, ngem no adda ti panagtalek iti karelasyon ket alisto metlaeng a mapukaw ti saan a nasayaat a marikrikna.
Sungbat daytoy ni Bianca kalpasan a nasaludsud kenkuana no saanda nga agselselos iti nobyo na a ni Ruru Madrid tunggal adda ti sabali a kapareha da kadagiti aramiden da a proyekto.
Nasaludsud pay ken ni Bianca no ugali na met a check-up’en ti cellphone ti nobyo na, banag a naglikudan ti aktres gapu ta inkalintegan na nga adda ti panagtalek ken respeto na iti aktor.
Mainaig iti daytoy, inpalgak ni Bianca nga iti pito a tawen a relasyon da ken ni Ruru ket adon dagiti pannubok a napasaran da gapu ta ado ti toxic iti aglawlaw, kangrunaan na iti industriya a paggargarawan da.
Nupay kasta, kuna ti aktres nga amin dagit nadadagsen a pannubok a sangsangwen da iti nobyo na ti ad-adda pay a nangpatibker iti relasyon da, nga itan ket agpito a tawenen nga agayan-ayat da.
