LAOAG CITY – Inpakaammo ni P/Capt. Angelyn Aguinaldo, Deputy Chief of Police ti Batac City Police Station nga addan iti nasayaat a kasasaad ti biktima iti pammaltog iti Barangay Bungon iti siudad ti Batac.
Segun kenkuana, nabigbig ti biktima a ni Zaldy Gabriel, agtawen ti 38, naasawaan ken residente ti Barangay Baay iti nasao a siudad.
Inbatadna a basar iti inwayatda nga imbestigasion, kabayatan nga agbanbantay ti biktima iti car wash-da iti paset ti Manila North Road ket adda ti dua a lallaki a nakalugan ti motorsiklo ti kellaat a nangpaltu-paltog kenkuana.
Inlawlawagna a kalpasan ti insidente ket insigida a naglibas dagiti suspek a nagturong iti saan pay a masinunuo a direksion.
Kunana a natamaan iti paset ti buksit ti biktima a manarimaan nga agpapaimbag pay laeng iti Mariano Marcos Memorial Hospital and Medical Center iti siudad ti Batac.
Mainaig iti daytoy, kuna ni P/Capt. Aguinaldo a dati a drug personality ti biktima ken adda dagiti naawatna a pangta iti biag kadagiti naglabas a tawen.
Naammoan a calibre 45 ti inusar a paltog dagiti suspek iti napasamak nga insidente.
Kabayatanna, agtultuloy pay laeng ti naun-uneg nga imbestigasion dagiti otoridad no ania ti motibo dagiti suspek iti pammaltog.
