LAOAG CITY – Positibo a binigbig dagiti biktima ti budol-budol ken panagtatakaw idiay ili ti San Nicolas a dagiti nangbiktima kadakuada ken isu met laeng dagiti natiliw ditoy ciudad ti Laoag.
Daytoy ti inbatad ni Police Chief Inspector Paul Benedict Parado, chief of police ti PNP-San Nicolas.
Segun kenni Parado, binigbig dagiti biktima dagiti dua a babbai a natiliw kalpasan a naiyaban dagitoy tapno mapan da kitaen dagiti suspek.
Inbatad na nga 80 percent nga agkarkarupa ti maysa kadagiti suspek iti facial sketch babaen ti panangiladawan ti biktima ti budol-budol itay laeng kallabes.
Mainaig iti daytoy, kuna ni Parado a nakikoordenar da iti PNP-Dagupan tapno siguradwen no pudno dagiti inbatad dagiti suspek a pakabigbigan da ket napaneknekan a residente da iti nasao a ciudad.
Inlawlawag na nga addan ti dati a mug shot dagiti dua a suspek a kayat na sawen ket addan dati a kaso da ditoy Ilocos Norte.
Kunana a mapilaan dagiti suspek ti 2 counts iti maymaysa a kalse ti kaso.
Innayon na a nupay mapyansaan ti kaso da ket siguradwen da a maiwaras dagiti ladawan dagiti suspek kas ballaag iti publiko ken tapno saanen a maulit ti pasamak.
