LAOAG CITY– Kinumpirmaran ni Police Corporal Edward Rabanal, imbestigador ti PNP-Traffic Division iti ciudad ti Batac a pimmusayen bayat a maag-agasan ti biktima iti napasamak a desgrasya iti Barangay Nalupta iti nasao a ciudad.
Nabigbig daytoy a ni Jonathan Abellon y Anday, agtawen ti 50, naasawaan ken residente iti nasao a barangay.
Basar iti imbestigasyon ti PNP, bayat nga agpapaamyanan ni Abellon a nakalugan ti bisikleta ket immovertake ti Suzuki rider nga inturong ni Johnmark Garcia y Silac, agtawen ti 19, maysa nga aglet-lechon ken residente iti Barangay Bil-loca iti nasao a ciudad ken dagiti lubbon na ket da Clifford Damasco Galacgac, 18 ken Joh Patrick Garcia y Rivera, 19.
Gapo iti daytoy, nagsagaba ti dugol iti ulo ken gasgas iti nagduduma a paset ti bagi ni Abellon idinto a dagiti nakamotorsiklo ket nagsagaba met ti gasgas iti bagi da.
Naamoan a ni Abellon ket nakainom ti nasanger idi napasamak ti insidente.
Manamnama met nga agsarita ti pamilya ni Abellon ken dagiti nakadungpar kenkuana apaman a maitabon ti biktima.
