LAOAG CITY – Kritikal ti maysa a lalaki a naitaray iti Mariano Marcos Memorial Hospital and Medical Center idiay ciudad ti Batac kalpasan a nabiktima ti hit and run idiay Barangay 19 iti ili ti San Nicolas paratikular iti asideg ti kapilya.
Napasamak ti pannakadungpar ni Larry Tumamao Jr. y Ramil, agtawen ti 32, awanan ti asawa ken residente iti Barangay 17, Sta Asuncion iti nasao nga ili.
Basar ti inisyal nga imbestigasyon ti PNP-San Nicolas, kasangsangpet ni Tumamao iti kapilya a nakalugan ti motorsiklo ken nagparking iti Manuila North road.
Naamoan a dumalyasat ti biktima manipud iti nagparkingan na ket maysa a motor ti nagpataray manipud iti amyanan a direksyon.
Gapo iti daytoy, nadungpar ti biktima ken naipurwak iti agarop 15 a metro ti kaadayo na manipud iti nagparkingan na.
Nagsagaba ti biktima ti nakaro a sugat ti ulo ken iti nagduduma a paset ti bagi na a nakaitarayan iti ospital.
Inbatad ti PNP a ti suspek ti hit and run ket nagturong iti abagatan a direksyon.
Narekobre met dagiti otoridad dagiti dadduma a partes ti motor ti suspek ken agtultuloy ti imbestigasyon ti pulisya seknan iti nasao a banag.
