LAOAG CITY – Pimmusayen ti biktima ti napasamak a desgrasya idi Abril 5 iti Bacarra, Ilocos Norte bayat a maag-agasan iti Governor Ablan Senior Memorial Hospital (GRAMSH) ditoy ciudad ti Laoag.
Nabigbig ti biktima a ni Felix Garalde, agtawen ti 45, naasawaan, mannalon ken residente iti Barangay Cabusligan iti ili ti Bacarra.
Maipalagip a bayat nga agpapa-amyanan a direksyon ti nakamotorsiklo nga inturong ni Jupiter Borromeo, agtawen ti 23, naasawaan, maysa a car technician, taga Barangay Naglicuan iti ili ti Pasuquin ket nasapgud na ti biktima bayat a bumallasiw ti kalsada.
Naitaray ti biktima iti nasao nga ospital ngem idi laeng kalman ket naideklaran a natay.
Iti agdama, maisagsaganan ti kaso a reckles imprudence resulting in homicide kontra ken ni Borromeo.
