LAOAG CITY – Umaboten iti 18 a tattao dagiti natiliw dagiti otoridad gapu ti panaglibas da a simrek ti danger zone iti Big Island, Hawaii.
Inbatad ni International Bombo Correspondent Manny Pascua a manamnama ti pannakaidatag dagiti maseknan iti korte para ti pannakaipataw kadakuada ti maiyannatop a multa.
Maipalagip a naiget nga ipawil dagiti otoridad a sumrek dagiti saan nga otorisado a tattao iti danger zone gapu pay laeng ti agtultuloy a panagalburuto ti Kilauea volcano.
Mainaig ti daytoy, umabot metten ti nasurok a 100 dagiti balay a nadadael gapu ti panagayos ti lava iti Lower Puna District, Big island, Hawaii.
Kabayatanna, inpakaammo ni Pascua a bayat ti kangitingitan ti panagalburuto ti Kilauea Volcano ket naaramid pay laeng dagiti dua a lallaki ti naghold-up ti nasao a lugar.
Nupay kasta, dagus a natiliw dagiti otoridad dagiti suspek ken naala iti ikot da dagiti banag nga hinoldup da.
