LAOAG CITY – Nanayunan manen ti bilang dagiti driver a naiyisoan ti citation ticket babaen kadagiti kameng ti Philippine National Police – Aviation Security Group gapu iti overcharging ken illegal a panagpasada kadagiti erupuerto iti rehiyon uno.
Daytoy ti inbatad ni Police Col. Renante Baltazar, ti mangidadaulo iti Philippine National Police-Aviation Security Group iti rehiyon uno.
Inpasingked na nga agtultuloy ti panagmonitor ken panagsita da kadagiti driver a nalabes unay ti panagsingir da ti plete kadagiti pasahero da ken dagiti illegal ti panagpasada na.
Maipalagip a kadagiti naglabas a bolan ket adda dagiti tricycle for hire a naiyisoan ti citation ticket gapu iti nalabes unay a panagsingir da ti plete kadagiti pasahero da iti Laoag International Airport.
Inpakaammo met ni Baltazar a sipud adda ti tiniliw da a dua a taxi driver ditoy probinsya gapu iti panagpakontrata da kadagiti pasahero da ket awanen ti sabali a natiliw da pay.
