LAOAG CITY – Inpakaammo ni Atty. Donato Balderas, Schools Division Superintendent ti Department of Education – Schools Division Office of Ilocos Norte nga addan ti agarup 75 a ribu ti bilang dagiti enrollees iti pampubliko ken pribado a pagadalan ditoy probinsia para iti School Year 2025-2026.
Segun kenkuna, adda pay ti 10 a porsiento wenno agarup 11 a ribu nga estudiante ti maiyur-uray nga ag-enroll kadagiti nagduduma a pagadalan ditoy probinsia.
Inbatadna a sipod idi Hunio 16 wenno ti umuna nga aldaw ti panaglukat ti klase ket awan met dagiti naipadpadanon kenkuana a seryoso a problema.
Inlawlawagna nga obligasionda nga awaten latta dagiti naladaw nga ag-enroll nga estudiante.
Mainaig iti daytoy, kuna ni Atty. Balderas a dimmalan ti panagsanay dagiti mangisursuro iti Grade 2, 3, 5 ken 8 para iti Enhanced K-12 Curriculum.
Kunana nga adda dagiti napili a pampubliko ken pribado a pagadalan manipud iti rehion uno para iti pilot implementation ti revised Senior High School Curriculum.
Nupay kasta, inpakaammona nga awan pay ti napili a pagadalan ditoy probinsia.
