LAOAG CITY – Bimmaba ti bilang dagiti maab-abuso a babbai ditoy siudad ti Laoag.
Daytoy ti inpasingked ni Mrs. Perlita Cabello, mangidadaulo ti City Social Welfare and Development Office ditoy siudad ti Laoag.
Segun kenkuana, adda ti uppat a kaso a nairekord iti opisinada iti agdama no sadinno a nababbaba daytoy no maidasig kadagiti naglabas a tawen.
Inbatadna a dagiti maseknan ket dumaldalan ti one on one counseling, maipaayan ti tulong pinansial ken dadduma pay.
Inlawlawagna a masapol nga agbalin nga open minded dagiti babbai wenno inna no kasapulanda ti tulong tapno saan nga agtennag iti pannakaabuso kadakuada.
Innayonna nga adda ti ipatpatungpalda a programa a kabinnulig dagiti barangay officials ken maseknan nga ahensia ti gobierno tapno ad-adda a matulungan dagiti maab-abuso a babbai.
