LAOAG CITY – Inbatad ni Ms Charis Garma, mangidadaulo ti Department of the Interior and Local Government ditoy ciudad ti Laoag nga umaboten iti 14 nga SK officials ti nagikkat iti posisyon da ditoy ciudad.
Daytoy ket nanayunan ti 5 sipud inreport ni Sang Kabataang Federated President Michael Chistophe Agustin iti naudi a sesyon nga addan ti 9 a nairekord ti council da a nagresign.
Kunana nga iti agdama ket dumawdawat ti opisina na iti listaan dagiti a nagikkat nga SK officials ditoy ciudad ti Laoag.
Immunan nga inbatad ti Department of the Interior and Local Government ditoy ciudad nga iyur-uray da ti guidelines nga iparuk-at ti Commission on Elections no maipalubos a maigiddan ti pannakaisayangkat ti special election iti umay a midterm elections.
Inlawlawag pay ni Garma a basar iti agdama a joint memorandum ti National Youth Commission ken ti Department of the Interior and Local Government a ti guidelines iti pananglitop dagiti nabakantean a posisyon ket babaen ti succession wenno appointment ti local chief executive.
Kabayatanna, naamoan a ti rason dagiti nagresign nga SK officials ket adda ti napinpintas nga oportunidad para kadakuada.
