LAOAG CITY – Inbatad ti Philippine National Police a bimmaba ti bilang dagiti naireport a krimen iti pagilian iti napalabas a tallo a bolan.
Iti maysa nga statement, nailanad a bimmaba ti 13.96% dagiti index crimes, manipod 6,961 kaso idi Hulyo 22,2025–Agosto 25, 2025 iti 5,989 a kaso idi Agosto 26–Oktubre 30, 2025.
Bimmaba pay ti 14.01% ti focus crimes iti kapada a panawen.
Mainaig iti daytoy, inbatad ni Acting Chief PNP, PLTGEN Nartatez a sipud Agosto 26 agingga iti Oktubre 30 ita a tawen ket nakaisayangkat ti Philippine National Police ti 9,061 anti-illegal drug operations a nagresulta iti pannakaarestar ti 10,434 a drug personalities, pannakakemmeg ti 8 a dadduma pay a drug personalities, ken pannakakumpiskar ti ₱1.91 billion a balor ti illegal drugs.
Inpakaammo ni Nartatez nga adda met ti 11,500 a wanted persons a naarestar ti nailian a pulisya wenno simmuko idinto a nasurok a 5,600 a loose firearms ti nakumpiskar wenno naisuko.
Innayon na nga ad-adda pay nga immune ti koordinasyon ti Philippine National Police kadagiti Local Government Units ken dadduma pay a sektor, isut gapuna nga alisto ti reporting, ad-adda nga epektibo dagiti operasyon ken ngimmato ti public trust.
Kabayatanna, inpetteng ni Nartatez nga awan ti lugar iti baro a Philippine National Police dagiti pulis a saan a napudno iti serbisyo.
Inpaganetget na a nalawag iti pagannurutan ti organisasyon a zero tolerance iti aniaman a klase ti korapsyon ken panagabuso.
Nagballaag pay a saan nga agpangadua a mangikkat iti organisasyo da ti siasinno man a mangdadael ti dayaw ti uniporme a naikawes kadakuada.
