LAOAG CITY – Umaboten iti 15 a tattao ti natay iti panagdinnungpar ti dua a tren iti asideg ti Jakarta, Indonesia, no sadinno nga arigna amin dagiti biktima ket babbai.
Napasamak ti insidente idi Lunes iti Bekasi Timur Station idi maipagarop a naidungpar ti long-distance train iti likudan a paset ti nakasardeng a commuter train.
Ti nasao a bagon ket nairanta para kadagiti babbai a pasahero a mangipapaay ti espasyo kontra iti harassment.
Umabot iti 88 a sabsabali dagiti nasugatan a dagus a nakabil iti nagduduma nga ospital para iti pannakataming da idinto a dagiti natay ket naipadalan iti proseso ti pakabigbigan kadakuada.
Basar iti state-owned railway operator PT Kereta Api Indonesia, natalged dagiti 240 a pasahero ti long-distance train a karaman iti insidente.
Agtultuloy ti imbestigasyon dagiti otoridad, karaman ti Indonesian police ken ti National Transportation Safety Committee, tapno maamoan ti eksakto a makaigapu iti insidente.
